近排忙於處理水貨客問題嘅保安局局長黎棟國，尋日去開行政會議前先去政府總部餐廳快食個靚早餐，特別係歎番杯奶茶提神點都唔少得。佢話自己身為一個「奶茶精」，獨沽一味只愛港式茶餐廳嘅絲襪奶茶，皆因英式奶茶茶味唔夠濃，提神功效有限，而台式奶茶就太甜，唔啱佢口味。雖然茶餐廳奶茶好飲，但黎棟國話茶餐廳嘅咖啡就唔係佢杯茶喇，如果要飲咖啡，都只係會飲cappuccino同latte一類，估唔到黎局長對飲奶茶同咖啡都咁講究。
