政情：楊受成捐助孤老善養
去年出版自傳《爭氣》嘅英皇集團主席楊受成，尋日將賣書收益所得嘅二百多萬港元，再加上由「楊受成慈善基金」額外撥款，合共捐出三百萬元予「無國界社工」，力撐在湖北武漢推行嘅孤老善養服務。
英皇與「無國界社工」喺內地合作搞孤老善養服務已經六年，並邁向第七年，原來中聯辦社會工作部部長張鐵夫係佢哋嘅「媒人」。
原來當年楊受成之所以認識「無國界社工」，全靠張鐵夫穿針引線。楊受成話，曾親自到訪湖北探訪老人家，眼見唔少孤寡老人晚境淒涼，深受感動，所以今次捐三百萬元，希望推動更多外展服務。
楊受成又話，《爭氣》本自傳月前喺內地推出簡體版，第一版已賣晒，依家趕印第二版，四月仲會推出電子版添。