政情：泛民放走魔鬼
去年靜雞雞通過嘅《公司條例》被揭內藏魔鬼細節，原來條文中包括禁止公眾查冊，令傳媒唔可以查閱公司董事資料，亦唔可以透過車牌得悉車主資料。去年審議條例期間，唯一一位出聲話禁止查冊好有問題嘅，就係前立法會議員劉健儀（Miriam），佢大爆當時冇一個人出聲話咁做會廢傳媒武功，不單止來自法律界嘅議員，連部分有傳媒經驗嘅議員都諗唔到呢一點，個個好似蒙住雙眼睇唔到嘢咁。
審議時已覺不妥
有「Bill后」之稱嘅Miriam，歷年嚟審議過唔少法案，佢話去年審視公司條例時已經發覺唔多妥，但佢自己唔熟傳媒運作，所以都係從法律角度出發，對禁止查冊一事好有保留，認為咁做不單降低營商透明度，仲難以分清董事嘅法律責任，可惜成個立法會冇人同佢有相同觀點。
而且唔止建制派，就連泛民主派如民主黨何俊仁（鐵頭仁）、公民黨湯家驊等大狀都話冇問題，工商界代表如梁君彥更支持通過修例，話公司董事都要有私隱權，所以Miriam先至唔敢再出聲。
Miriam仲爆料話，最估唔到嘅唔係鐵頭仁同湯家驊，而係有十幾廿年傳媒經驗嘅議員，竟然連佢都走漏眼，只係略略提過話禁止公司查冊會對小股東不利，容許班大股東用盡掩眼法搞財技都冇人踢爆，從來無諗過禁止查冊會變相廢傳媒武功，最弊係佢哋依家先至嚟出聲，咁會唔會太遲呢？
講返Miriam，雖然佢冇再做議員，但對立法會形勢仍然跟得好貼，現時每星期返立法會最少兩次，主要開黨團同義務分析條例草案有咩魔鬼細節。佢除咗返立法會外，仲多咗時間返律師樓幫手，得閒做吓公證人，得閒又幫啲細姪做吓證婚人，收入都好和味o架。至於會唔會再落區打選戰，Miriam就話現時積極培訓黨內新人，希望個黨唔使一味靠啲元老撐住喎。