唉，一則以喜，一則以悲，香港運動員得咗！香港運動員失咗！
先講講乜嘢係得咗吖，榮耀歸於「牛下女車神」李慧詩。洋名Sarah嘅李慧詩繼上星期六贏得本年度單車世界盃系列賽爭先賽總冠軍之後，再接再厲延續「兩個轆逐個捉」嘅港產神話，喺墨西哥站競輪賽雖然不敵三位中國對手而只得第四名，不過仍然累積二十分力壓群雌粥粥，登上總盟主寶座，成為雙料總冠軍，各位觀眾請鼓掌！
Sarah早於倫敦奧運已經以一面銅牌展示佢嘅打不死精神，同九六年奧運金牌得主李麗珊遙相呼應，再一次證明「香港運動員唔係垃圾」。而且由於單車選手屢創佳績，更加掀起一股銳不可當嘅單車旋風，甚至乎有人悟出寓意深長嘅處世哲學——人生在世就好比踩單車上路，永遠向前，不能退後，途中必須保持平衡。
李慧詩嘅故事當然激勵人心，好可惜體育圈總會有求勝心切嘅不法之徒。香港全運及亞運金牌得主，BMX車神王史提芬加盟職業車隊轉戰公路賽，去年四月被驗出服用禁藥外源性類固醇，被國際單車聯盟（UCI）判罰停賽兩年，直至二○一四年五月二十八日先至「刑滿出獄」，聽講仲被罰款港幣大約二十萬元。
美國傳奇單車手岩士唐點解要服用禁藥而搞到自己身敗名裂呢？無他嘅，勝利衝昏頭腦吖嘛，貪婪毀滅靈魂吖嘛，運動員最大嘅競爭對手往往係自己嘅心魔。港產名將王史提芬之所以犯下同一錯誤，好明顯又係受到輸唔起嘅心魔作弄。
功夫茶始終欣賞有風度嘅體育精神，好似西班牙一個長跑選手Ivan Fernandez Anaya咁吖，見到一直領先嘅肯尼亞裔選手Abel Mutai擺烏龍，臨近終點十米之前誤以為自己已經完成賽事，傻更更跑出賽道，位列第二嘅佢冇執死雞衝線搶走冠軍寶座，而係提醒對方重回跑道完成比賽。風度翩翩贏盡喝采嘅Anaya話呀：「我覺得自己不值得贏出，我做了該做的事，他才是名正言順的勝利者。若非他跑錯路，我沒可能追上他。」
講到呢度，香港運動員其實真係幾可愛，除咗一個王史提芬之外，極少聽聞有人求勝心切而出蠱惑。喂，大家都知道特區官僚對於體育界係幾咁冷淡o架啦，要資助冇資助，要設備冇設備，本地選手自食其力掙扎求存，即使輸咗九成都冇話走捷徑服用禁藥，單係呢一點已經令人敬佩。冇錯，獎牌可以輸，人格不能敗！
點都好啦，好心港產官僚認真扶助體育界，唔好餐餐只係識得跳出嚟叨光。