前世界美國網球明星阿加斯在自傳寫道：「你知道，兒子，我曾經也像你一樣，長髮飄飄。你將來不要用那種遮蓋禿頭的梳頭法欺騙任何人啊！」
阿加斯訓示兒子的話，使老朽聯想起「時事稱王，娛樂稱霸」，上周五一書兩冊，活潑讀者雙眼嘅《好報》，時事嗰一冊，再揭貪曾劣行，歎盡省港澳，好外遊做離岸特首，豪住總統套房嘅佢，疑身有屎，竟將十年帳目毀屍滅迹，去年由禮賓府搬去政府總部時，銷毀檔案數目，足足等於三幢國金大樓的高度。如果單據被消失咗就等於冇貪腐，就等於冇事發生，香港呢個廉潔奉公、法治嘅社會──真係死得！
阿加斯訓示個仔唔好用那種遮蓋禿頭的梳頭法欺騙任何人，今貪曾索性來個毀屍滅迹，一不做二不休，如果佢施政都有咁嘅狠勁，咁乾淨利落，香港就唔會積弱成咁，之不過，天網恢恢，疏而不漏，老朽相信因果報應，滅罪鑑證科，唔該勤力啲做嘢啦！
早前廉署嘅工作報告，煞有介事強調要「調查所有涉及政府官員涉嫌以公職身份蓄意干犯行為失當罪的貪污指控」，所謂「蓄意行為」，老朽想起一雞一菜都舔盡嘅曾蔭權爵士，其貪婪何止失當，簡直係失控！
今貪曾逍遙成年，廉署若一味祭出「不評論個別個案」，成日放空槍，放得多，聽慣咗，林裏的麻雀仔都唔驚喇！「政成而民德，易則生亂」，古時講禮樂教化，今講奉公守法，否則廉潔無法推行，賞罰不明，社會又怎會有公平正義，又點會唔民怨爆煲？