政情：收料站：劉江華處男下海哄動
政制及內地事務局副局長劉江華尋日首次處男下海，去咗佢舊地盤立法會開會。劉副局講過佢負責做內交工作，多啲同內地溝通。觀乎佢尋日去立法會政制及內地事務委員會，佢獨自承擔起匯報私隱專員公署工作嘅環節，應該會跟番人權事宜。政制及內地事務局局長譚志源（Raymond）就話，劉副局仲會處理反性傾向歧視嘅諮詢。咁佢有冇機會掂吓政改呢？Raymond就話，政改全世界都要落水，全民皆兵連律政司都要幫手喎。
尋日喺立法會，唔少議員都為可以幫佢「開齋」非常雀躍，社民連主席梁國雄長毛仲特登整咗個牌諷刺劉副局「保皇牆頭草，敗部竟復生，遙知都是糞，為有腐臭臨」。有議員話立法會唔少人都同劉副局有唔少牙齒印，叫Raymond講清楚劉副局第日會負責咩項目，局長答完，議員都唔多滿意，結果都係要劉副局「開金口」。