日前，立法會秘書長陳維安（Kenneth）喺社交網站facebook上載咗一張大頭照，引起網友們嘅熱烈討論。唔少人都話認唔出係佢，有人讚佢型仔，亦有人話佢似「變形金剛」，而最搞笑嘅評語，相信非勞工及福利局局長政治助理莫宜端（Zandra）莫屬，皆因佢話Kenneth似果蠅喎！
點解Zandra會咁講？事關呢張相入面嘅Kenneth，戴住個橢圓形嘅銀綠色頭盔，配埋副墨鏡，又確係有啲似果蠅對複眼。Kenneth月初喺新西蘭度假時跌爆咗左手腕骨，有人問佢係咪就係戴住呢個頭盔跌親，佢解釋話，呢身裝扮係玩四個轆嘅Quad Bike用，冇咁易出事。而佢跌傷嗰次，係由兩個轆嘅電動車Segway跌落嚟嘅。佢仲多謝大家關心，已無大礙喎。