政情：廢腑之言：將院產科冇預產期？
孕婦生仔有預產期，但原定今年出世嘅將軍澳醫院產科服務，連政府同醫院管理局都唔知幾時生得出呢個BB。
政府尋日喺立法會衞生事務委員會話，唔係「胎死腹中」，只係人手不足、其他服務需求大同埋區內出生嬰兒未到每年三千個嘅指標，答應只要醫生、護士夠人就可以開產科，但畀唔到個時間表，議員張超雄要求政府，「既然唔係胎死腹中，都畀個預產期我哋（議員）吖，連幾時出世都未知」。
代表政府嘅食物及衞生局副局長陳肇始話，會繼續檢視人手、其他服務需求等再決定。劉慧卿聽到就慶，「仲要睇其他服務需求有幾殷切，海枯石爛都未掂！」葛珮帆批評醫管局○八年向立法會申請撥款擴建將軍澳醫院，應該計好條數，依家就開張「空頭支票」出嚟，將軍澳區孕婦生仔，要搭的士去聯合醫院，真係好慘，政府當佢哋有「特異功能」咩。