工聯會立法會議員郭偉強喺施政報告答問大會當日好幸運咁抽中咗第一個向特首梁振英（CY）提問，不過佢當日講到口窒窒，仲成塊面紅晒添。大家梗係以為作為新丁嘅郭偉強口才有待磨練啦，點知佢尋日喺立法會嘅一個會議就忽然神勇，質問公務員事務局局長鄧國威時字字珠璣，仲識得鬧政府用陰招添。原來喺答問大會嗰日，郭偉強畀坐前排嘅工聯會陳婉嫻（目及）到實一實，所以先緊張到條脷打晒結。
郭偉強尋日喺立法會開會，會上講到非公務員合約員工待遇問題。郭偉強批評政府用陰招，令一啲非公務員合約員工冇得轉做公務員，「嘢就繼續做，服務就繼續存在，但就將轉做公務員嘅期望粉碎！」仲話感到「好遺憾」添，全程數據、例子兼備，說話流暢，同喺答問大會上口窒窒咁問CY，點解唔落實標準工時的時候完全判若兩人。
究竟點解郭偉強嘅口才會喺短短幾日間突飛猛進呢？原來係因為答問大會當日佢畀坐喺前排嘅嫻姐全程（目及）實，所以先至咁緊張。睇嚟冇嫻姐（目及）實，郭偉強至可以將自己嘅實力，釋放出嚟。