政情：立會舊傢俬有歷史 陳健波三千蚊買古物
立法會搬入添馬艦新大樓後，多咗一份時代感，但就少咗一份典雅。不過保險界議員陳健波（波波）辦公室就仍然好古色古香，仲有少少舊大樓嘅影子，原來波波之前用咗三千蚊投咗四件舊大樓舊傢俬。與其話係舊傢俬，不如話佢買咗一批歷史文物。
垃圾桶考起清潔阿姐
立法會秘書處早前就為幾百件「殘餘物資」舉行拍賣會，波波用咗三千蚊投咗四件傢俬，部分仲係酸枝嘅，包括一張書枱、一個衣帽架、一套酸枝椅，就連垃圾桶都獲得波波垂青。不過立法會清潔女工就一度被呢個舊式垃圾桶考起，因為唔識點打開個垃圾桶蓋倒垃圾，波波話真係笑到碌地呀！
波波用三千蚊買嘅，其實係一批古物，好似張木書枱係前立法局一九八五年搬去昃臣道大樓時設計嘅，同期應該有好多張，張枱櫃桶用銅扣。波波就話，就算個掛衫架，都有好多名人用過，好有歷史價值。波波又感嘆話，有啲同事實在太孤寒喇，肯出價過千嘅人，少之又少。