政情：中總青委換屆 曾智明交棒大唱Ｋ歌
中華總商會青年委員會早前換屆，由冧莊咗兩屆主席嘅全國政協委員曾智明（Ricky）交棒畀德昌（有記）企業創辦人李德剛（Alfred）。前晚青委一班兄弟姊妹近五十人，拉大隊喺銅鑼灣一間卡拉OK店包咗間房，齊齊載歌載舞歡送Ricky，當晚大家自備靚紅酒、茅台頻頻舉杯，玩得好盡興。
唔識唱老婆黎瑞恩啲歌
Ricky兩杯黃湯落肚，即歌王上身大獻歌喉，佢笑笑口咁話自己咩歌都識唱，不過問到佢識唔識唱前歌手太太黎瑞恩嘅金曲《一人有一個夢想》時，佢就話唯獨係老婆啲歌唔係咁熟喎！唔知曾太聽到，會唔會幫老公勤練自己啲歌呢？身兼中總副會長嘅Ricky拍心口同大家保證，未來同大家嘅感情只會有增無減，事關協助青委發展，都係佢呢個副會長嘅職責喎！
榮升主席嘅Alfred笑言，接棒之後冇任何壓力，因為委員們一向都好團結，齊心就梗係事成啦。今屆「升呢」做副主席嘅霍啟山，與彭楚夫、林智彬、張俊勇等副主席都係靚仔有型、年輕有為，啟山好謙虛咁話，會繼續向各個前輩多多學習。