中環出更：廠商會慶功狂擦日菜
工展會早前圓滿煞科，生意額高達七億元，比去年上升一成半，主辦商廠商會笑逐顏開，會長施榮懷（Irons）同展覽服務有限公司主席吳永嘉（Jimmy）更帶頭包場搞慶功宴。
廠商會喺灣仔一間日式料理店包場，商會中人齊到賀，除咗前會長黃友嘉、副會長徐晉暉、吳清煥、行政總裁梁世華、展覽服務有限公司副主席李慧芬外，部分參展商代表及承建商都嚟舉杯慶祝。話明慶功，全場魚生、壽司、天婦羅任食，又勁開多支紅酒，氣氛高漲。Irons咁識做，員工爭住回禮，原來係三罐午餐肉同一件保暖底衫。食盡好嘢嘅Irons原來至愛係午餐肉，於是即場煎晒三罐午餐肉分甘同味。Jimmy都收到兩罐「養陰丸」，佢笑言啱晒補身，認真搞鬼。
工展會生意額大升
今年工展會到底有幾好生意？Jimmy笑騎騎話，冬菇賣到一隻都無，有燕窩參展商的生意額增加兩成幾，賣健康食品的生意額亦增加三成，銷售煮食爐具的更勁，做多四成生意，總之皆大歡喜。
卓妮