中環出更：史立德60大壽跳勁舞
廣東社團總會副會長兼華彩集團主席史立德（Allen），早前大排筵席慶祝六十歲生日，六、七百位城中老友齊去賀壽。咪以為踏入耳順之年，就要擺出一副老態，是夜Allen活力無限，當佢戴上黑超、着上花花西裝，竟然與瘋魔全球嘅韓國男星Psy有九成神似，佢同廿位來自仁愛堂幼稚園嘅小豆丁齊齊勁跳熱舞，有型又可愛，掀起現場一片歡呼聲，賓客情緒High爆。
太太獻唱情歌
當晚齊去賀壽嘅城中名流多到數唔晒，包括「玩具大王」蔡志明夫婦、莎莎國際主席郭少明伉儷、理文造紙主席李運強夫婦、工業總會主席鍾志平及副主席劉展灝，仲有仁濟醫院主席鄭承隆、仁愛堂主席黃達東及保良局副主席鄭錦鐘等慈善界同好。壽宴籌辦得咁成功，史太顏景蓮功不可沒，靚太仲獻唱一首《月亮代表我的心》，為生日會開場。Allen嘅四位兄弟亦攜帶家眷齊出席，子孫滿堂嘅史老太成晚開心到不得了。
李運強次子李文恩嘅外父郭燦耀夫婦亦有到場，原來李郭兩家相識好耐，李運強笑稱，當佢三個仔都仲未娶老婆時，佢就拎晒三個仔嘅相畀老友揀個做女婿，結果親家就揀咗最靚仔嗰個喎。農曆新年就到，已有十二隻馬嘅李運強話，過年將去新西蘭揀馬，今次目標係買廿隻。吓？咁多？大家冇聽錯，事關好多老友都同佢要馬嘛！
卓妮