林奮強不該被姦 爛果報值得鄙視

最新一宗壹淫媒講大話事件係咁嘅，爛果報頭版雞乸咁大隻字報道「林奮強完全歧視新移民」。呢嗱嗱嗱，先唔講當事人點樣反擊，只要智商唔係嚴重偏低嘅港男港女都應該明白，一個有頭有面正在休假嘅行政會議成員，有乜可能當眾公然兜口兜面話自己歧視新移民呀？所以報道一出街，功夫茶已經覺得爛果報死性不改又老作。

好嘞，睇番林奮強自己點講，佢老哥攞出錄音帶澄清，內容係話：「我完全唔係歧視新移民，嚟到香港嘅，法律上係香港人就係一等公民。」事實清楚明白，當事人冇講過歧視新移民，只不過爛果報別有用心，十分毒辣咁夾硬將「唔係」兩個字抹走，含血噴人污衊林奮強嘅人格。

講到呢度，功夫茶奉勸各位達官貴人，以後除咗謹言慎行之外，對住爛果報記者講嘢真係要特別小心，要將「係」同「唔係」嘅字眼加重語氣，以免傳媒敗類斷章取義。譬如咁講吖，你一話「我完全唔係貪遍海陸空」，爛果報記者有可能老屈你係「完全貪遍海陸空」，馬上將你同過氣特首曾蔭權撥歸同一類貪婪之徒。

見到人哋攞得出錄音帶澄清，爛果報總編輯張劍虹死死地氣承認報道錯誤，並且向林奮強道歉。一如所有A字膊族群一樣，張老總唔係自己承擔責任，而係賴咗記者聽錯。

唉，天下烏鴉一樣黑，壹淫媒日鬧夜鬧執政集團「你呃人」，又話問責高官有責不問，到頭來自己咪又係咁無恥賤格。冇錯，執政集團經常呃人，尤其係貪曾更加得到民間團體107動力頒發大話王桂冠，之不過貪威識食嘅官場中人起碼唔會短短一日即穿煲咁低能吖嘛。爛果報對於卸責官僚最常用嘅批判係「你落台」，功夫茶在此懇切呼籲，有責不問嘅張劍虹，你落台！

大家有冇留意內地《南方周末》被強姦事件？林奮強家陣嘅情況就好比南周，無可奈何受到淫魔精神強姦，辣手摧花之後幾乎連叫救命都冇辦法。計功夫茶話齋，林奮強不該被姦，爛果報值得鄙視，如果有人話完全歧視壹淫媒，有識之士應該冇人反對囉！