《蘋果日報》失實報道，其實已經唔係新聞，其屈得就屈，作得就作嘅渲染手法，為谷銷紙而不顧公德公義，行內有口皆「悲」，亦已深植讀者腦海，只是每當有乖乎常識嘅老作，讀者內心必然自我反省：爛果報講嘅都好信嘅！睇來《蘋果日報》可以大剌剌話自己「老作第一」，名正言順，咁老屈老作後，認衰道歉都慳番！做個真小人，起碼都有啲真性情，唔好成日站在道德高地，話為民主為下一代奮鬥啦前世！
今次爛果報喺正頭版，雞乸咁大隻字，誣衊休假嘅行會成員林奮強，喺一個閉門講座上指佢「完全歧視新移民」，幸好講座有聲帶證其清白，否則，林先生滿腔鬱結，縱使「低頭一拜屠羊說，萬事浮雲過太虛」，自己睇得開，掛冠而去唔撈，可是，一世英名奮鬥出頭，就此蒙上低級幼稚的政治錯誤，內心蒙不白之冤屈相信難以平息。
爛果日報老作前科數之不盡，最經典嘅九八年「陳健康事件」，其老屈報道，曲折離奇，其公信力早已破產；老朽看過一則資料，話說在德國達豪集中營入口處，刻着十七世紀一位詩人的話：「當一個政權開始燒書的時候，若不加以阻止，它的下一步就要燒人！當一個政權開始禁言的時候，若不加以阻止，它的下一步就要滅口！」
是的，當爛果報仍不斷在老作老屈新聞人物、影視名人，若不加以阻止，它的下一步就是……看官，歷史的悲劇不斷在重演，當林奮強今次被老屈「歧視新移民」，若沒有聲帶證清白，下次難保不會被老作「欲趕盡殺絕新移民」！劊子手就是這樣練成的！