本港法律界分開事務律師同大律師兩個專業，後者純粹負責打官司同畀法律意見，好多人普通話都唔多掂，甚至連畀北大人點名訓話，都冇乜人聽得清楚訓話內容，想反駁都無能力。
話說大律師公會喺去年六月訪京，做過大律師公會主席嘅公民黨立法會議員湯家驊，無喇喇報咗名參加，其後有公會中人轉告大口湯，話佢畀上面列咗做不受歡迎人物，大口湯惟有自己知趣「退團」。原來當時仲係做緊港澳辦副主任嘅張曉明，一早準備好喺接見公會訪京團時，點名批評大口湯同公民黨黨魁梁家傑等泛民大狀，所以先至透過中間人勸退大口湯，費事佢當面畀人訓話咁尷尬。
事後大口湯向有參與會面嘅大狀，打探自己究竟畀人鬧乜，但包括公民黨黨友郭榮鏗在內嘅多名團友，都因為普通話兼記性麻麻，只係聽到張曉明有提到佢同梁家傑，但聽唔清詳細內容，「大致都係反中亂港喇！」據聞會面時有部分團友即時離場表示抗議，不過唔知佢哋係咪其實因為普通話唔掂，所以冇選擇即場發言反駁對方呢？