政情：李天穎茹素身體好
新地非執董郭炳湘太太李天穎（Wendy）向來熱心公益，前日無懼寒風，晨早行山籌款，見Wendy精神煥發，心情開朗，原來佢近日意識到食肉太多對身體無益，加入茹素行列。
由「生命熱線」舉辦嘅「愛‧喜‧行」慈善步行籌款活動，旨在喚起大家珍惜生命，咁有意義，吸引逾四百位善長參加，由薄扶林水塘道步行至山頂，身為生命熱線名譽贊助人暨執行委員會主席嘅Wendy，一身七彩運動服現身，青春氣息十足。呢條路有少少斜，但難度唔算高，Wendy話之前行過，有晒經驗，結果唔使一粒鐘就行畢全程，合共籌得逾一百萬港元，靚太發功，果然勁！
少肉少毒素
抵達終點一刻，見Wendy氣都唔喘一下。咁Fit，有原因嘅。原來佢愛上茹素，啟發佢嘅，多得一本書叫做《Forks Over Knives》，令佢明白肉類含好多毒素，尤其係牛肉，睇書後決定減少食肉，每當唔使出外應酬，都會食清啲。佢仲自爆，身邊唔少好友都轉趨食素，唔知老公郭炳湘有冇受佢感染呢？