中環出更：陳燭光裝身 愛大紅大紫
單身貴族唔憂嫁，已故教育家陳樹渠嘅千金、本身係一間投資公司老闆嘅陳燭光（Zandra）就追死唔少城中才俊。不過Zandra一啲都唔心急，一於靜待真命天子出現。近日相士話佢知今年桃花大旺，要好好把握。為催旺桃花，Zandra聽晒相士話，以「大紅大紫」顏色裝身，日前就撞見佢喺中環ifc行街，專睇鮮色衫褲鞋襪、鮮色唇膏。
一身橙紅色羽絨嘅Zandra上周日傍晚現身ifc，正值名店瘋狂減價，佢顯得好雀躍，先去睇衫，再去名媛最愛嘅GIUSEPPE ZANOTTI DESIGN睇鞋。架上一對鮮紅色四吋高跟鞋，吸引佢眼球，Zandra馬上叫店員拎畀佢試，喺鏡前左望右望，忍不住甜笑，不過睇真啲，原來對鞋大咗半個碼，店員話減價期間斷晒碼，最後都係買唔成。
望新年行桃花運
Zandra再轉戰化妝品專門店睇唇膏，專挑鮮艷顏色，但試來試去，都係唔多啱心水。最後，行經一間甲油專門店，即時眼前一亮，原來店內有玫瑰紅色及紫色甲油，顏色Sharp到極。埋單計數，每支只賣百幾元，一於兩支都買晒。卓妮上前傾偈，Zandra滿心歡喜話，新年時會搽靚甲油，希望行番個桃花運。
卓妮