政情：老竇係消防處長 陳奕妍攞榮譽警棍畢業

從警員做起晉升督察

廿六歲嘅陳奕妍，同父親陳楚鑫嘅樣貌有幾分相似，雖然身份係處長個女，但仕途並唔係一帆風順，○八年於科大經濟及財務學系畢業後，隨即投考見習督察，但因社會經驗不足落選，但佢未有放棄，最後甘願放低身段去東區警區做一名散仔，多番努力後終成功晉升督察，駐守深水埗。　問陳奕妍點解唔繼承父親衣鉢做消防部門，佢話因為初中時遇到交通意外，事發時好驚，幸好有警員安慰，個心先定番啲，自此之後認為做警察好有意義，就立志做個好警察。佢又話，雖然父親喺成功人士，但入學堂以來冇同學知道佢身份，加上佢話唔會畀家庭背景影響佢工作時做嘅決定，所以完全冇壓力喎。