有東方，冇窮人，大家聽得多，證明《東方日報》幾咁深入民心。既然係咁，《太陽報》同屬東方報業集團，有太陽就會點呢？功夫茶話過大家知，有太陽，冇衰運！
嗱，有一宗活生生嘅事例可以印證，睇《太陽報》絕對好人有好報。有一個二十八歲後生仔胡國傑，不幸患上血癌，可惜同佢相依為命嘅係養父而唔係生父，所以希望搵番失散多年嘅親生爸爸，求嘅係血脈相連嘅家人捐出骨髓延續生命，藉此報答養父撫育多年嘅恩情。呢一個故事經過《太陽報》頭版報道之後，不但感動咗萬千讀者，更加發揮咗神奇效能，阿傑嘅親生哥哥一睇報紙即刻覺得人有相似，跟住同爸爸求證，馬上確認故事主人翁就係自己失散多年嘅親生細佬，一家人終於團聚。
簡單咁講，《太陽報》銷量強勢第三位並非浪得虛名，讀者夠多自然效用宏大，一日之間已經足以令到失散二十八年嘅家人破鏡重圓，而且有機會救番一個血癌病人，從死神手上搶番一個有為青年，簡直係功德無量，善莫大焉！
經過記者穿針引線，一家團聚之後講出另一個無可奈何嘅故事，原來阿傑生父劉順之所以忍痛將阿傑交託養父胡錫津，其實係生活逼人嘅結果。劉順當年每日打三份工養活一家四口，餐餐粗茶淡飯仍然捉襟見肘。阿傑出世嘅時候，好衰唔衰被任職嘅茶樓炒魷魚，經濟狀況跌入谷底。朋友介紹有意領養子女嘅胡氏夫婦，劉順見對方環境不俗，終於簽署同意書將孻仔託孤。劉順回首前塵好感慨咁話：「仲好記得當時佢出世幾日，好輕，得四磅。我喺醫院門外抱住佢，親手將佢遞畀胡生，之後廿八年都冇再聯絡過。」一字一淚，聞者心酸。
家人重逢嘅一刻，百般滋味在心頭。八十七歲嘅劉順，長子阿雄，幼子阿傑，以及八十六歲嘅養父胡錫津，不約而同流下男兒淚。茫茫人海重遇手足，阿雄義無反顧咁話：「普通人有能力都唔介意捐血、捐器官幫陌生人，更何況係我親細佬？如果驗血證明我哋骨髓脗合，一定無條件捐畀佢！」
有太陽，冇衰運，仲有一件事要提一提。你知啦，接受骨髓移植手術或者其他藥物治療非財不行，太陽報愛心基金眼見阿傑同養父收入微薄，撥出二萬元緊急援助金解決燃眉之急。即係咁，阿傑目前最低限度尋回親生爸爸同哥哥，骨肉之情失而復得，若然進一步透過骨髓移植重獲新生，簡直好過中十次六合彩！
講到呢度，功夫茶送上無限祝福，阿傑，努力呀！加油呀！爭氣呀！全人類支持你！