三十六名新任港區全國人大代表上月選出，其中差唔多一半都係新丁，所以安排佢哋參加迎新會都係唔少得嘅節目。聽聞呢班人大新丁會喺下星期一，與多位連任及即將卸任嘅港區人大一齊去深圳開會同聯誼吓，並交換吓心得。據聞原本兩日一夜嘅行程又唔知咩原因，縮短至一日，有人大代表就話，咁反而仲好，因為盡顯港人嘅效率咁話。
其實每年港區人大代表都會喺一月中旬去深圳開會，過往通常會同全國政協委員一齊去，為三月份喺北京舉行嘅兩會做好準備，同場仲有內地官員介紹最新嘅國情。不過，由於今年新任政協委員仍未出爐，所以只有人大代表出席，順道為啲人大新丁搞吓啲迎新活動，等啲人大前輩過番兩招，唔知係咪因為只得港區人大出席，所以要將行程縮短到一日呢？
即將卸任港區人大嘅溫嘉璇之前去內地考察時整傷隻腳，搞到之後嘅活動都冇出席，咁啱得咁蹺，聽聞另一即將卸任嘅港區人大高寶齡亦喺選前整親隻腳，唔知道佢哋到時會唔會出席深圳港區人大迎新會呢？