政情:有相為證:立會廁所環保

立法會秘書長陳維安(Kenneth)好支持環保,最近佢仲將環保意識滲入立法會洗手間,喺鏡箱嘅抹手紙標示旁加貼「節約用」三字,希望大家節約用抹手紙,用少一張得一張。不過,「節約用」三個字相當細粒,灰底白字嘅設計亦都唔起眼,絕對係一項眼力測試。但講到尾,節約用紙,愛惜樹木都係常識,即使唔使人提醒,洗手後先稍為滴乾雙手,再取紙抹手,一張都應該夠晒啦,或者大家留意吓自己攞抹手紙時會攞幾多張呢?