政情：廢腑之言：鼠王芬叫建築工改名 「城市美容師」

向來創意無限、金句多多嘅西九新動力立法會議員梁美芬（鼠王芬），自從成功連任後，風頭一時被同屬建制派嘅新丁盟友蓋過，佢亦沉寂咗一排。不過，鼠王芬尋日終於推出新作，話說立法會大會上討論建造業人手短缺時，建議將建築工人改名為「城市美容師」，話可以洗脫建築行業辛苦兼冇前途嘅負面形象喎。發展局局長陳茂波聽完後真係一頭霧水，完全唔知畀咩反應鼠王芬，同鼠王芬高唱《快樂西九》立法會選舉戰歌一樣，娛樂性十足。