尋日朝早十點，公共專業聯盟梁繼昌（Kenneth）收到警方中區重案組電話，對方一開聲就話有件事想邀請佢協助調查，仲要求佢有時間就去一趟警署，搞到Kenneth即時嚇咗一跳，諗嚟諗去都唔明自己做咗啲乜，搞到要畀警方通緝？
原來喺去年八月尾近立法會選舉時，Kenneth嘅助手喺立法會對面嘅中信大廈天橋掛直幡，諗住方便啲義工派單張。點知單張未派，選舉事務處已經收到匿名投訴，話Kenneth嘅宣傳品違規阻街，Kenneth惟有急急腳搵人拆番張直幡。
雖然選舉事務處同佢講明，只要拆咗啲旗幡就會冇事，但點知Kenneth尋日仍然收到中區重案組電話，邀請佢就事件返警署協助調查。Kenneth認為警方竟然為呢啲芝麻綠豆事立案調查，簡直係絕頂無聊，又話自己身為監警會委員，出入警局係家常便飯，不過畀警方邀請協助調查都係第一次喎。
其實違規就係違規，唔應該話件事細啲就唔使理，Kenneth作為立法會議員，法治觀念要加強啲噃。