政情：西泠印社王褆真迹曝光
一九○四年成立嘅中國印學社團「西泠印社」，一直係書畫文化嘅寶藏，國學大師饒宗頤更擔任現任社長。早前西泠印社創辦人王褆嘅外孫，拎咗王褆嘅真迹畀本港畫家余元佳鑑賞，余老師一睇就驚嘆大讚係寶，極有歷史價值，叫後人一定要好好保存。
王褆真迹包括兩幅扇面、一個象牙印章，仲有一本講述西泠印社歷史嘅志稿印刷本。余老師話，王褆係中國著名書法家，最擅長篆書同隸書，雕刻功力亦好了得。當中價值最高嘅莫過於係兩幅扇面，王褆分別用篆書同金文臨摹古詩同南宮孟鼎，由運筆就可以睇到功力有幾深厚。
至於個印章雖然唔係用石雕，睇唔到王褆風格，但因為係真迹亦價值不菲。而嗰本《西泠印社志稿》就記載咗西泠印社由成立到其中三個創辦人離世嘅歷史，對後人研究西泠印社發展有好大幫助。王褆外孫話啲藝術品係媽媽由上海老家嚟香港嘅時候帶落嚟，珍品所剩無幾，唯一擔心係仔女唔識保存。