喺新民黨主席葉劉淑儀擔任入境處處長及保安局局長時，佢嘅「掃把頭」髮型同嘴角上嘅「為食癦」經常畀人大做文章。雖然葉太曾經講過要捍衞自己嘅髮型，但最後都係將「掃把頭」剪走咗。咁粒癦呢？葉太近日照鏡時，赫然發現連粒「為食癦」都變細兼變淡，佢對呢啲印記逐漸消失感到萬分感慨。
葉太當年力銷廿三條立法，佢嘅「掃把頭」成日畀人揶揄，佢就揚言「如果我連髮型都捍衞唔到，又點可以捍衞香港治安」，言論惹火，後來佢辭職去美國讀書，之後脫胎換骨，連「掃把頭」都唔見咗。
葉太近日發現，佢連粒癦都差啲唔見咗，有人仲質疑葉太為改變形象而走咗去脫癦。為正視聽，葉太尋日高調喺社交網站圖文並茂咁澄清自己並無脫癦，仲話自己曾向副主席史泰祖醫生請教，睇吓粒癦「突然淺色」嘅原因。佢話史醫生同佢講，多數癦嘅顏色會隨住歲月加深，但有啲癦會基於免疫系統攻擊而褪色。葉太話既然問嚟問去都問不出所以然，惟有用「原因不明」四個字概括成件事喎。