政情：車公之約 發叔要問病魔
農曆新年就快到，又係鄉議局主席劉皇發去沙田車公廟為香港求籤嘅時候喇！發叔每年都好重視年初二去車公廟求籤，求籤前會先齋戒沐浴更衣。不過，發叔自從上月患上感冒後，有傳佢多次出出入入醫院，但始終未有露面，因而令外界揣測佢嘅病況，更有鄉紳擔心發叔未能為香港求籤，事關唔可以冇人求籤，亦好難搵人代替佢求籤。究竟發叔到時會否痊愈上陣？抑或帶病現身呢？
發叔近年喺新界嘅氣勢已大不如前，年前被踢出屯門鄉事委員會，到去年鄉議局換屆選舉，亦有人對其主席寶座虎視眈眈，雖然保得住主席寶座，但其後屢遭鄉紳同村民挑戰，特別係處理新界村屋僭建問題上備受批評。發叔近期因病入院，外界未能清楚得知佢嘅病情，因而再度令鄉郊勢力蠢蠢欲動。咁啱下月就到農曆新年，大家都猜測發叔喺年初二會否如常去車公廟求籤。
我哋之前講過，發叔患上嚴重感冒，所以失咗聲，再加上食嘅藥太烈，所以要留喺家中休養，而佢囝囝劉業強就話，發叔只係剩番啲痰未清。
龍年籤文 「鬼神」應景
聽聞發叔已經好得七七八八，雖然未有出席公開活動同立法會會議，但每日都會返自己辦公室坐一陣，處理文件；所以如無意外，發叔年初二仍然會去車公廟求籤，有傳佢明日就會現身出席立法會內務委員會同財務委員會，下星期更會同家人大搞生日派對沖喜吓。
相信大家仲記得發叔去年為香港求嘅第二十九籤中上籤：「何為邪鬼何為神，神鬼如何兩不分，但管信邪修正外，何愁天地不知聞」，解曰「凡事皆吉」，發叔當時仲笑住咁話支籤好似講緊當時正進行嘅特首選舉選戰，支籤至今仲係令人難以忘記，唔知佢嚟緊去求籤，又會否為香港求番支同樣咁特別嘅籤呢？