中環出更：「病劉」搞喊女粉絲
捲入澳門歐文龍世紀巨貪案嘅華人置業主席劉鑾雄（大劉），早幾日以糖尿病為由缺席澳門審訊。事隔兩日，大劉尋日下午一點鐘再次出動，喺多個保鏢陪同下，同母親、妹妹等先後到灣仔富豪飯堂食飯，見佢步履輕盈，精神唔錯。期間有一名女士企喺飯堂外守候，更高舉寫上「love，大劉」自製心形牌力撐大劉，但大劉不為所動，一小時後登上私人座駕離開。問大劉幾時出庭？點睇有粉絲支持？佢都封口唔回應。
據了解，呢個女粉絲叫做Alice，大約二十多歲，佢話前幾日已開始在酒家門外守候，而尋日朝早就十一點幾鐘到場，手上嘅心形牌整咗四個鐘。
答非所問 無語離去
卓妮嘗試同Alice溝通，但佢似乎答非所問，問佢跟咗大劉幾耐，佢答「隨緣」；問佢係咪鍾意大劉？佢就話「人間有愛」，但並非想好似甘比咁「入宮」喎。至於問佢點解支持大劉，Alice就話人生有低潮，支持大劉咁話。不過，佢坦言唔知大劉有冇貪污，要審過先至知。
到大劉離開酒家時，Alice想上前送個牌畀大劉，可惜被大劉嘅保鏢阻擋，埋唔到身，一度傷心落淚，問佢會唔會繼續支持大劉？佢冇回應就離去喇。