立會否決彈劾CY

動議由社民連梁國雄提出，是繼上屆立法會就「貪曾」前特首曾蔭權爵士的連串貪腐醜聞提出彈劾後，歷來第二次彈劾特首動議。民主黨何俊仁指彈劾動議具歷史性意義，炮轟梁振英「大話一個蓋一個」，又沒勇氣接受調查，「只係希望好似僭建大宅咁用牆遮住佢」。公民黨郭榮鏗表示，特首須向立法會負責，批評梁振英向立法會講大話，是不尊重甚至破壞憲政制度，建制派盲目挺梁，須付出破壞法治的代價。

蔣麗芸畀動議「激死」

民建聯蔣麗芸質疑彈劾動議缺的理據︰「睇完十幾頁紙，洋洋灑灑，唔嚇死都激死！」又指梁振英認錯大宅僭建情況只是無心之失，「男人結婚紀念日都記唔清，何況個花棚？」民建聯主席譚耀宗批評泛民在未有真憑實據下作出指摘，只是把莊嚴的彈劾權利當成政治鬥爭工具，行為令市民齒冷。自由黨方剛則說，僭建事件已成為梁振英的重大污點。

有支持彈劾動議的示威者，帶同前港英殖民政府旗幟倒梁。（高嘉業攝）

梁振英昨晚出席活動時，未有回應記者任何問題。

民陣包圍指罵建制派

政務司司長林鄭月娥回應表示，立法會已先後否決針對梁振英的不信任動議及特權法議案，已反映市民意願及社會利益，政府及立法會不應再耗費時間在此議題，應集中精神處理重要的政策及民生課題，希望這是立會最後一次討論事件。

動議最後以三十七票反對二十七票贊成否決，全部出席建制派都投了反對票，自由黨田北俊、張宇人、鄉議局主席劉皇發、醫學界梁家騮及民建聯鍾樹根則缺席投票。

支持及反對彈劾動議的團體，昨日亦分別在立法會外示威。其中挺梁的「愛港之聲」動員約卅人遊行至立法會，聲言要為香港「注入正能量」，有成員更主動走近敵對陣營「挑機」。民間人權陣線傍晚在政府總部外舉行的集會，高峰期有百多人參與，他們在彈劾動議否決後，一度包圍及指罵步出立法會的官員和建制派議員。

梁振英昨晚出席百仁基金就職禮時，沒有回應記者任何問題。期間有一批社民連示威者到場示威，一度與會場保安發生推撞。

倒梁

范國威（新民主同盟）：台灣陳水扁被人話自編自導自演槍擊案成功贏大選，梁振英就以講大話（贏選舉，將競選對手唐英年）僭建定為誠信問題，賊喊捉賊，佢有咩資格做特首﹖

莫乃光（公共專業聯盟）：何喜華（社區組織協會主席）都轉軚覺得梁振英施政乏善可陳，連「梁粉」都跳船，條船有幾穩陣﹖

何俊仁（民主黨）：調查可以還佢（梁振英）公道，不過佢冇咁嘅勇氣，喺度嘅議員同梁粉都冇咁嘅勇氣面對事實，只係希望好似僭建大宅咁用牆遮住佢，眼不見為淨！

李卓人（工黨）：「我冇講過我冇僭建」，反映梁振英誠信、品格卑劣。

挺梁

蔣麗芸（民建聯）：我主修心理學，慣咗睇人……佢連廁所加個窗都申請，跟足規矩，佢對住個花棚同傳媒講冇僭建，好明顯係唔知係僭建……佢話花棚係搬入前建，佢係無心之失……男人結婚紀念日都記唔清，何況個花棚﹖

譚耀宗（民建聯）：泛民提出彈劾三項指控都站不住腳，明知冇理據、唔會通過，都把莊嚴嘅彈劾權利當成政治鬥爭工具，係會受市民齒冷。

方剛（自由黨）：梁振英即時下台會令香港陷入混亂，公務員士氣受打擊，自由黨唔支持倒梁行動，包括彈劾。佢僭建會記入歷史、傳媒資料庫同立法會檔案中，成為梁振英重大污點……梁振英，自由黨會監察你！