早兩日，運輸及房屋局副局長邱誠武先至承認，政府冇全面掌握劏房數據，又話「有啲劏房劏得好四正」，邱副局長被立法會議員批評為涼薄，變相默許劏房存在。正當大家莫名其妙，唔知點解官老爺懵到上心口連劏房數據都掌握唔到嘅時候，大家終於明白咗一件事嘞，就係統計處故意唔去統計劏房，統計員一見到劏房就掉頭走。
統計處顧名思義就係做統計，可惜最近被傳媒揭發統計造假。首先係失業數據有問題，統計員由於務求「做得快、好世界」，藉此向上司表現工作效率，所以調查問一半唔問一半，統計員靜雞雞自己填充頂替受訪者。另外，統計員視劏房為畏途，一見到單位門外有幾個門鐘就心知不妙，寧願過門而不入，向上匯報未能聯絡或者講大話搪塞。
因乜事幹統計處嘅統計員懶得咁交關呢？原來係咁嘅，假設劏房單位係一劏三，統計員就要做三份問卷，不過統計處只當作完成一宗個案。萬一統計員遇上超級無良嘅賤格業主，單位一劏十甚至以上，做問卷做到手軟都係當作完成一宗個案，浪費時間同精力換番嚟嘅評價可能係「工作效率慢過蟻躝」。喺咁嘅情況之下，精甩辮嘅統計員就會對劏房不聞不問，而劏房住客嘅生活狀況自然唔會大白於天下喇。
講到呢度，大家明唔明點解邱副局長冇辦法全面掌握劏房數據？你知啦，高級官僚本身不學無術，基本上係靠低級官僚餵料先至可以寫得出官樣文章，既然下面嘅統計員冇去深入了解劏房數據，高高在上嘅官老爺咪傻頭傻腦乜都唔知囉，靠佢哋諗辦法改善港式貧民窟嘅非人生活，困難程度同窮人想移民去火星差不多。
既然被揭發一筆弄虛作假嘅糊塗帳，統計處處長歐陽方麗麗就話嘞，將會成立小組全面調查統計員涉嫌造假嘅報道，並會向財經事務及庫務局局長提交報告。歐陽太太仲話，將會跟進相關前線統計員，局方對於數據造假係零容忍，必須保障數據嘅可靠性同專業性。
喂，統計處自己查自己有冇公信力o架？萬一所謂調查又係弄虛作假，點算好呀處長大人？所以計功夫茶話齋，市民對於調查造假都係零容忍，最好交由審計署之類嘅獨立部門跟進調查，以免調查工作同樣係問一半唔問一半，調查員靜雞雞自己填充。
即係咁，數據造假等於情報誤導，實在係兵家大忌，試問蝦兵蟹將又點會唔打敗仗呢？如果唔想特區政府繼續腦殘而治，當務之急係誠實面對數據，一係一，二係二，絕對唔可以再顛三倒四！