特首梁振英首份施政報告會喺下周三發表，港府內部正密鑼緊鼓做好最後準備工作，施政報告嘅三十多秒宣傳片亦喺日前面世。不過，宣傳片中每個市民嘅臉孔都以橙色圖案遮蓋，莫非冇面見人？有網民寸爆話，呢個宣傳片或多或少反映港人失去咗自己嘅臉容，因此出現呢個「被代表」嘅情況，甚至係有「面目模糊」嘅感覺。有政府中人回應話，用橙色圖案代表市民面孔，其實只係呼應番之前施政報告諮詢網頁首頁嘅設計圖案，希望用啲輕鬆手法令市民印象深刻啲喎。
（互聯網）