由港區全國人大代表譚惠珠做榮譽會長嘅香港促進現代化專業人士協會，前日舉行周年晚宴，特首梁振英應邀出席，查實當日出席嘅仲有惹火嘅政制及內地事務局副局長劉江華。據聞呢次劉江華係首次以副局長身份出席大型活動，有網民事前收到風打算去「贈興」，事後有冇付諸實行就不得而知，但佢上任至今都貫徹低調作風，睇怕都係想先做啲成績，以回應外界嘅批評。
各界極為注視劉江華嘅「第一次」現身無聲無息就過咗去，但大家唔需要失望，事關佢好快又會出現喺公眾面前，因為本周五佢會同局長譚志源「行孖咇」出席深港合作會議，聽聞政務司司長林鄭月娥都會出席，唔知劉江華到時會否主動用普通話同內地官員打交道呢？
劉江華喺政壇打滾多年，大家都嗌咗佢做「劉華」或「江華」，轉換新環境後究竟有冇稱呼上嘅改變呢？有知情人士話，不外乎有三種叫法，包括「江華」、「副局」同「劉先生」，當中以「副局」呢個稱呼應該對佢嚟講係最新鮮，但講到尾稱呼都係一句，最緊要係合作愉快啫。