糾纏多月嘅香港數碼廣播有限公司（dbc）股份爭拗，隨着股東鄭經翰（煲呔針）等人願意出售股份而終告平息，而煲呔針嘅電台台長職位就要被「搣柴」，轉任電台顧問六個月。雖然煲呔針嘅新職位名義上要協助電台順利過渡畀新領導層，但據聞實際係唔會畀佢掂電台嘅日常運作，避免佢有機會繼續搞事，但至於佢個新職位實際工作係乜，暫時就未有人知道。如果佢冇得參與電台運作，咁可以做乜呢？莫非用十幾二十萬元月薪，請佢幫電台節目嘉賓斟茶遞水、掃吓地、洗吓廁所？
