經濟民生聯盟（經民聯）成立咗幾個月似乎冇乜做過好戲，佢哋尋日就打正旗號請願為民生，表面上係威係勢，但其實就一盤散沙，事前毫無準備。
話說佢哋嘅離島區議員鄺官穩同大埔區議員羅舜泉尋日拉埋幾個社區幹事一齊去食環署請願，要求署方即時下調新界食肆嘅牌照費，但現場竟然連一個食肆商戶代表都冇。
其實傳媒想問吓啲商戶，究竟食肆牌費佔商戶經營成本幾多呢？商戶經營有幾困難？而牌照收費不一又有幾不公平？
冇商戶現身說法，一眾區議員同社區幹事嘅答案離不開「好貴」、「好難」同「好唔公平」，實質啲就係不滿市區同新界食肆牌照費用相差達一倍，所以佢哋要求可以下調新界食肆牌費。
其實，市區同新界食肆牌費不一，只因二○○○年政府解散兩個市政局後，牌費至今仍未統一，好多人都對呢個問題鬧到唔想再鬧，並瀕臨放棄，經民聯今次揀咗呢個議題，確係人棄我取。