捲入澳門歐文龍世紀巨貪案嘅華人置業主席劉鑾雄（大劉），喺案件開審前幾日忽然高調發表偉論，話中央政府嘅反貪腐工作應包括港澳特區，又話唔可以畀港澳特區政府有人利用程序，將中央玩弄於股掌之中。咁啱得咁蹺，大劉女友呂麗君名下嘅新到馬匹名為「替天行道」，莫非係配合大劉之前嘅言論，若有所指？不過，「替天行道」尋日喺沙田馬場首次試閘只跑得尾二劣績，確係出師不利。
大劉涉及嘅貪腐案前日開庭審訊，但大劉以糖尿病在身為由唔出庭作供，而大劉一家尋日再冇現身灣仔富豪飯堂，不過佢女友呂麗君隻新馬「替天行道」就有試閘。原來匹馬前日先獲賽馬會通過命名，英文名叫Poetic Justice，係出自名種愛爾蘭馬，去年尾來港時都曾經現身游水、踱步，但試閘係首次，而往績都唔算差，但點解嚟到香港就搞成咁呢？
據知情者話，「替天行道」嘅練馬師約翰摩亞呢幾日操得隻馬好密，睇嚟係想趕住畀佢出戰本月中嘅經典一哩賽事，但係大家都知道「揠苗助長」嘅後果，只會弄巧反拙。知情者又話，幫匹馬改乜嘢名，都要睇吓隻馬受唔受得起喎。