政情：黃成智仲有「出路」
民主黨（白鴿黨）嘅落選立法會議員黃成智喺選舉期間，遭本報獨家揭發以「出路社會服務中心」等友好組織名義，向長者免費派包捲入涉嫌賄選，當時佢對係咪辭任「出路」主席嘅說法版本多多，一時又話已辭任，一時又話董事會仍未討論。不過事隔三個多月後終於真相大白，黃成智翻兜做「出路」社會服務總監，話佢同「出路」關係唔密切都冇人信啦！
派新卡片隱白鴿身份
黃成智一夜之間由「雙料議員」變成「雙失議員」，之後轉趨低調且動向成疑，最近有人終於收到黃成智嘅新卡片，但佢喺卡片上絕口不提其白鴿黨成員嘅身份，反而標榜佢係「出路」社會服務總監。更令人意想不到嘅係，黃成智早前舉辦活動時竟向建制派工商界「撲水」搵贊助，事後究竟呢班工商界有冇贊助或捐出禮物就不得而知喇，但佢呢個做法真惹人聯想。
查實黃成智一向都係白鴿黨嘅中堅分子，過去多年打正旗號搶議題、搶曝光嘅事迹都多不勝數，佢突然將白鴿黨嘅身份收埋，反搵建制派「科水」，莫非對劉慧卿做主席領導嘅白鴿黨冇信心，寧可自成一格為四年後重出江湖鋪路？