政情：民協提防鼠出沒
民協盤據九龍西多年，但今屆立法會依然只得馮檢基（阿基）一人當選，貫徹「一人黨」作風，但阿基現時貴為超級議員，資源只係比以往多少少，但橫額、辦事處就要覆蓋全港咁多個區，變相被迫分薄資源，好難再集中人力物力死守九龍西一區。據聞梁美芬嘅西九新動力，都睇準民協「兩頭唔到岸」嘅弱點，諗住籌備下屆區選重錘出擊「拔筍」（竹筍係民協徽號），搶民協票源。
要兼顧全港難集中
民協喺○八年立法會選舉成績麻麻，但阿基可以集中資源同精力耕耘九龍西一區，令民協未至於亡黨，但下屆選舉就唔可以翻用同一招數，因為阿基做咗超級議員，服務對象唔只九龍西，就算做吓門面工夫都要喺香港島、新界東等地方開設辦事處，就算唔開辦事處，點都要掛吓街板橫額充撐場面，如果唔係實畀市民投訴。不過正因為咁，佢哋嘅資源唔再集中喺九龍西，好容易被人有機可乘。
梁美芬先下手為強
既然民協個筍頭凸咗出嚟，你唔去拔筍，其他人都會打主意，所以九龍西嘅建制派政團好似西九新動力咁，已經決定先下手為強，計劃攻佔民協餘下老巢地盤。西九新動力中人評估過，民協現時剩低喺九龍西嘅十一個區會議席，雖然過往幾屆勉強力保不失，但唔代表呢啲議席牢不可破，因為該區有唔少舊樓已經重建，選民唔再偏向基層，所以西九新動力呢類形象較為獨立、好似好中產嘅政團，應該有力與民協一戰。
不過，瘦田冇人耕，耕開有人爭，連自由黨都想加入拔筍行列，佢哋決定下屆區議會選舉只集中搶攻三大區域，分別係香港島、新界東及九龍西。該黨中人認為，九龍城區有唔少中產區，只係上屆唔夠時間派樁腳落區，如果預早三年派人做地區工作，下屆選舉應該會有啲成績。自從周梁淑怡復出擔任主席後，好似好有計劃咁，雄心萬丈改革黨路向，但成唔成功，就真係要過幾年至知喇。