中環出更：「九十後」李楚洳以畫代口
對社會議題表達不滿，有年輕人以遊行方式表達，亦有人用其他形式。好似「九十後」嘅新進藝術家李楚洳（Samantha），就以其自創嘅「相中畫」形式表達佢對各種社會問題諗法，最近佢仲同香港第一代「玩具大王」林亮搞Crossover，將三張維港相片加工，喺水上畫咗幾隻林亮公司嘅招牌玩具鴨仔，新舊交融，認真高意境。
表揚林亮奮鬥故事
開畫展嘅李楚洳只得廿二歲，佢細細個已醉心油畫同攝影，現時係港大藝術系三年級生。佢話今次好開心同林亮合作，因為佢嘅奮鬥故事好值得年輕人學習，所以專登揀咗林亮嘅鴨仔公仔加入畫中。而林亮亦好興奮，希望Samantha第時啲畫可以再加入鴨仔，傳承佢嘅拚搏精神。
講開又講，Samantha爸爸就係廠商會副會長、全國政協委員李秀恒；而林亮嘅公子，卻係行政會議成員兼立法會議員林健鋒，林亮話，個仔愛吹牛，所以做議員就啱晒佢嘞。