中環出更：名人大讚陳復禮作品 「影畫合璧」
能夠將興趣發展為事業仲獲得稱頌嘅人不多，喺國際獲獎無數嘅攝影大師陳復禮就係其中之一。最近有媒體為陳復禮搞晚宴，近百位名流現身捧場，相當熱鬧。出席嘅中港照相器材集團主席孫大倫話，佢爸爸同陳復禮係老友，所以佢好早就認識呢位攝影界殿堂級人物，仲收藏咗幾本大師嘅畫冊添。
孫大倫認為，陳復禮最令人稱道嘅係「影畫合璧」嘅主張，即係將畫意融合於攝影嘅寫實當中。正因為陳復禮擁有精湛嘅攝影技巧與美學涵養，故此佢嘅作品洋溢濃厚嘅國畫韻味，受到推崇實屬理所當然。本身係攝影發燒友嘅霍英東長女霍麗萍話，大師鏡頭之下嘅神州景色特別美致，令佢都想前往內地拍攝快將消失嘅古城古鄉。
姪孫陳正欣捧為榜樣
另一出席嘅民政事務局副局長許曉暉就憶述，少年時代學攝影時已經拜讀陳復禮所創辦嘅攝影刊物，並深受大師嘅佳作所折服。佢話大師嘅作品充滿國畫風格，不但主次分明，且空間與主體嘅比例恰到好處，令佢領悟到藝術手法猶如處事方式，能夠拿捏事情重點，分清緩急輕重自然成功有望。
原來保良局總理陳正欣係陳復禮嘅姪孫，佢話大師十多年前宣告退休就係佢剛習攝影之時，所以未能從呢位長輩上學到一招半式。但陳復禮對於藝術嘅堅持與追求，就好值得佢倣效。
卓妮