政情：「前綫」玩晒 白鴿分飛
民主黨（白鴿黨）近日疑似爆發退黨潮，懷疑與該黨喺立法會選舉失利同剛結束嘅領導層改選有關，矛頭直指同樣來自前綫嘅新任主席劉慧卿（卿姐）及副主席蔡耀昌（狗哥）。有傳已經密謀退黨嘅黨員多達十幾人，大部分來自卿姐同狗哥嘅老巢新界東，但亦有說只有幾個人，來自不同地區及背景，退黨原因各異，未形成大規模嘅退黨潮。無論係邊樣都好，都顯示白鴿黨並無因為更換領導層而重新振作、結團上路，反而係危機處處、舉步維艱。
白鴿黨喺卿姐等原前綫成員加盟後，一度喺新東擁有卿姐、鄭家富、黃成智三名立法會議員同大批區議員，非常風光，但其後鄭家富因政改立場退黨，去年立會選舉該黨又因太大貪，同時派出三條名單參選，分散票源，最後僅得卿姐當選，黃成智連任失敗，狗哥更加以極低票數落選。
挫主流單仲偕招怨
消息透露，不少新東黨員，包括部分黃成智嘅支持者，對領導層當時執意派出狗哥參選，間接累死黃成智深感不滿；其後講過會「裸退」嘅卿姐又反口參選黨主席，並成功擊敗與黃成智同屬主流派嘅單仲偕；再加上喺區議會同立會選舉都落敗嘅狗哥，竟然可以擊敗喺兩場選舉都大勝嘅另一主流派成員胡志偉當選副主席，終於令到佢哋嘅不滿爆發，醞釀要集體退黨，隨時重演當年范國威等多名新東區議員集體退黨，另立新民主同盟嘅事件。
有不願透露姓名嘅黨員表示，卿姐靠自己實力連任立會同當選黨主席，佢哋無話可說，但狗哥喺毫無政績下極速上位，就完全講唔過去，尤其兩人都係來自前綫，令好多喺該黨同新東支部默默耕耘多年嘅黨員睇唔過眼，擔心來屆區選同立會選舉都會畀「前綫派」玩晒，因而萌生退意。
被指不利黨內改革
不過，經過我哋連日來明查暗訪，都證實唔到真係有大批白鴿黨員退黨。其中曾任該黨九龍西支部社區主任嘅黃子希，早前喺社交網站自爆早前已完成退黨手續，原因係「睇唔到個黨有啲咩發展空間」，又指聽到黨內有人話近月收到大批退黨申請，但唔知道實際退黨人數同姓名，唔排除部分人已獲領導層成功挽留，喝停咗呢次退黨潮。曾經喺北區參選嘅社區事務主任嚴志恒，亦向我哋證實正考慮退黨，原因係不滿當年有份入中聯辦傾政改嘅卿姐當選主席，不利黨內改革，但否認與卿姐同狗哥嘅前綫背景有關。