新一屆立法會開鑼短短三個月即出現首度流會；原訂審議多項民生議題及特首梁振英僭建事件，但三十二名委員竟只有九人準時出席，甩底的議員藉口多多，稱病、塞車、壞手機……當中大部分尊貴嘅議員無不「語言偽術」上身，CY睇怕都飲得杯落，因為估唔到「穩中求變，適度大話」喺立會上演！
老朽只能嘆一句，鬧市無處不堵車，滿城皆是說謊人！民生無小事，立會無大事，唔係拉布就係流會，咁搞落去，香港瓜得！學者指流會進一步損害立法會的認受性及支持度：「議員每個月收公帑九萬幾蚊，連會都唔開，市民點收貨。」
尊貴嘅議員們，平時在議事堂每站在道德高地，議論滔滔，詭辯聲威，然而，缺席、遲到致流會，卻完全是另一副嘴臉，完全沒有議員為市民大眾服務，該有的精誠所至的精神，高官不濟，議員不堪，香港未來，又怎會政通人和，又怎有可能出現和諧社會？
甩底議員被問到缺席、遲到原因，個個「視帝視后」上身，七情上面，真係點到你唔服？有本叫《清算謊言經濟學》嘅書，揭露美國房地產和股票市場崩潰的真正原因，原來元兇多聚集在充滿謊言的華盛頓，而不是華爾街。如今香港謊言的聚焦地，原來係立法會嘅議事堂而非娛樂圈！
論者指因謊言而帶來的繁榮，是虛假繁榮，旨哉斯言！香港無奈進入一個上下交相講大話嘅社會，則只會沉淪下去，道理明顯不過，一個社會誠信度低，透明度也愈低，運行成本就愈高，效率卻愈低下。
香港明天：謊言成雲，多雨吹歪風，有排冇陽光！