政情：深信旺自己 曾鈺成愛「伴虎」
立法會主席曾鈺成生肖屬豬，佢深信老虎有利自己，早前四出物色一幅老虎畫掛喺辦公室，全國政協王國強知道後熱心為佢張羅，好快就搵到擅於畫虎嘅名畫家韓石特別為佢畫咗幅老虎畫。幅畫掛起後，連曾太都好滿意，話隻老虎好在唔係惡形惡相。唔通曾太係屬虎嘅？
曾鈺成話，佢一直都遇到好多屬虎嘅人，所以毫不懷疑屬虎嘅人旺佢，包括佢師傅吳康民、十五年前同佢一齊創立民建聯嘅程介南、徒弟李慧琼同鍾港武，仲有○八年拍檔喺港島出選立法會嘅蔡素玉等，真係唔到你唔信。
辦公室風水多「睇法」
曾主席搬到新立法會大樓時，原本背住個窗口坐，但唔少人齊聲認為佢要靠牆坐，咁至有「靠山」，於是佢又嚟一個乾坤大挪移，靠牆而對窗。不過，正當佢認為新「方位」可令佢安枕無憂，見識廣博嘅議員石禮謙到訪，又話佢其實唔搬好過搬喎。
關心曾主席辦公室風水嘅，仲有佢一位同學嘅最新「睇法」，就係佢窗外右邊嘅迴旋處令女同事對佢不利，再睇左邊，係男同事對佢不利，於是教佢擺番個風水陣。其實呢個政壇紛紛擾擾，曾鈺成想過安樂嘅日子，唔知邊位師傅幫到佢呢？