中環出更：蔡冠深卸任中總冇時停
卸任中華總商會會長無耐嘅新華集團主席蔡冠深（Jonathan），雖然曝光率減少咗，但唔代表佢得閒咗。佢日前出席一個公開活動時話，依家唔使忙商會，但要將專注力放番喺盤生意上，一樣要經常做「空中飛人」四圍去，一邊傾生意，一邊積極對外宣傳香港。
積極推廣香港
雖然Jonathan冇再戴中總呢頂帽，但依然好落力改善香港嘅營商環境，佢落莊後兩個月內，一口氣去咗韓國、墨爾本、金邊、河內等地，推廣香港作為國際金融貿易中心嘅優勢。佢預料來年歐美經濟依然唔樂觀，唔少人都繼續北望神州，而佢自己就睇好東南亞一帶嘅經濟發展。Jonathan自上世紀開始，已經積極參加東盟舉行嘅會議，受惠於其帶來龐大嘅商機。
不過，Jonathan就算點忙都好，每星期都會帶埋老婆蔡關穎琴同寶貝仔女一齊行街睇戲，增進同家人之間嘅感情。佢仲話，有時睇完齣戲，仲會同仔女討論電影內容，借機會教育佢哋正確嘅價值觀，一舉兩得。