Thank God It's Friday!
功夫茶點解咁興奮要講英文呢？原因好簡單，因為每逢星期五係《好報》出版嘅大喜日子，不但功夫茶眉開眼笑，係讀者都熱切期待啦！
強勢登場嘅《好報》上星期創刊隨《太陽報》附送，並且喺全港超過一百個地點免費派發，結果唔使多講，當然大受歡迎，幾十萬份極速派完。講到呢度，功夫茶真係有啲歉意，唔好意思呀各位來遲半步嘅親愛讀者，如果上星期攞唔到人氣急升嘅《好報》，今日記住行快兩步以免走寶。萬一真係攞唔到都唔緊要，買一份《太陽報》就有得送㗎喇，學似上星期其中一位讀者話齋：「畀六蚊就有《太陽報》、《好報》，一份報紙錢兩份報紙內容，真係好抵，以後一定要捧場。」
講到上星期創刊派發嘅熱鬧場面咯喎，大家一定仍然津津樂道。派發員身穿醒神嘅紅色背心，冒雨向讀者奉上精彩絕倫嘅《好報》，雨水淋唔熄民眾嘅熱血，上班一族即使趕返工都耐心排隊取閱，平均十分鐘就派出過千份。主打娛樂新聞同副刊嘅《好報》除咗內容版面別樹一幟之外，派報員更加嚴格規定每人限取一份，所以唔會出現其他免費報章任人全疊攞走當廢紙賣嘅尷尬情況。你知啦，有啲免費報章未睇就被公公婆婆檢破爛，非常之咁唔環保啫。
《好報》到底有幾好？淨係東方報業集團出品已經係百分百信心保證，功夫茶唔怕話畀大家知，今期內容絕對比上期更加豐富同精彩。再靜雞雞同大家講一個秘密吖，下期《好報》加料炮製，可能一分為二，明益讀者！
有麝自然香，好嘢梗係有人識欣賞，《好報》創刊反應咁熱烈，廣告客戶冇可能唔爭住落廣告嘅。請各大廣告客戶放一萬個心，《好報》好，大家好，廣告效益必然更加好！
總而言之，善有善報，惡有惡報，《好報》面世對於好人係好事，對於壞人呢？咁就視乎佢做過乜嘢壞事嘞。《好報》最大特色係揭秘爆料，龐大嘅編採隊伍配合專業嘅辦報精神，邊個做過虧心事，邊個醜聞怕曝光，經過《好報》窮追猛打統統無所遁形。如果你係權貴階級，又好似前特首曾蔭權爵士咁樣「貪遍省港澳，歎盡海陸空」，功夫茶勸你及早自動消失好過，或者索性返去火星避難，皆因《好報》嘅正義狗仔隊將會全天候儆惡懲奸，唔係點可以叫做為民請命呀！
早有《東方》，後有《太陽》，今有《好報》。好人好事有好報，小人唔好當冇到。總而言之，東方紅，太陽升，好報來，今日大家記住攞一份正到爆嘅《好報》，或者買一份《太陽報》免費得之，過一過好好好嘅Happy Friday！