政情：廢腑之言：司法風暴陳弘毅冇話兒
究竟本港法制點樣可以喺「五十年不變」下「不斷變化」？人大常委又點可以「完善」對特區立法嘅監督權？司法界係咪將面臨一場風暴？雙非孕婦問題係咪要修改《基本法》解決？社會討論得咁熱鬧，如果有個法律學者指點吓迷津就好喇。不過，身兼基本法委員會委員嘅香港大學法律學院教授陳弘毅就好似對近期嘅時事有啲冷感，尋日佢喺新書發布會上只談新書不談時事。
「睇唔到 感覺唔到」
大家諗住請教陳教授嘅高見，但陳教授就好避忌話要先聽問題後再篩選，結果「好趕時間」嘅佢足足用咗五分鐘篩選問題，凡觸及時事嘅問題就一概不答，一味話「睇唔到」或「感覺唔到」。好彩最後陳教授都略盡學者責任講咗兩句，簡單啲講就係佢對本港法制發展非常樂觀。