政情：陳凱欣做政助乜都學
新官上任，去立法會派卡片已經成為返工頭幾日嘅指定動作。尋日就輪到兩位返咗工冇耐、曾任職傳媒多年嘅財政司司長政治助理羅永聰（Julian），同食物及衞生局政治助理陳凱欣去立法會。Julian返工近一星期，出席過銀行家嘅活動，返咗工三日嘅陳凱欣尋日就話，自己任職傳媒多年，但以往負責採訪醫療方面嘅新聞，跟依家工作性質唔同，所以樣樣都要學，呢十萬元人工真係唔易賺o架！
陳凱欣話轉咗行，返工時間同以前差唔多，不時星期六、日仲可以放假添，不過開會多咗、時間長咗、應酬亦密咗，變相同讀緊幼兒園嘅囝囝以及五個月大嘅囡囡相處嘅時間都少咗，所以會特別珍惜早上送阿仔返學嘅時間。佢仲話以前返工，可以不時打吓電話畀囝囝傾兩句，依家就難喇。
至於對囡囡嘅照顧，陳凱欣話，囡囡仲食緊母乳，所以喺早上除咗要送囝囝返學，仲要泵定啲母乳畀囡囡，認真忙得不可開交。要做一位成功嘅職業女性真係一啲都唔容易啊！