山光道馬會會所有室內外兩個泳池，但近排天氣凍，大部分人都轉戰室內池，而室內池本身已經唔係大，長度只係得廿五米左右，線道亦得六條，再加上馬會夠體貼，特登開闢兩條線道畀泳術不佳者，但試問班有錢名流又點會認自己泳術差，所以個個人都逼埋喺另外四條線度游。山光道泳池早前發生過碰撞事件，搞到有泳客撳人個頭落水，好可能都係因為泳池太逼所致。
除咗逼，馬會泳池仲有另一特色，就係朝早有班上年紀嘅尊貴會員游水，佢哋游得唔快，但動作極大，個個當正自己係參加奧運嘅飛魚，明明係游水但啲水花多到似跳水，其他人都怕咗佢哋，部分人更會喺池中間停低耍太極，真係畀十個趣佢都嫌少。