熊出沒注意！沉寂一時嘅「櫃機黨」再次蒲頭，而且個半月內四度犯案，簡直係神出鬼沒，愈來愈猖獗，大家千祈要小心喇！
所謂櫃機黨，即係喺銀行櫃員機做手腳，然後盜取客戶資料及款項嘅不法之徒。嗱，前晚有市民喺元朗永亨銀行櫃員機提款時，發覺被「卡住」，懷疑有人安裝咗讀卡器。警方調查後發現提款機有三處被人做咗手腳，包括入卡位置裝有讀卡器、鍵盤保護罩不翼而飛、螢光幕頂部出現疑似針孔攝錄機，問你怕未。
好明顯，櫃機黨睇準銀行保安漏洞再度出擊，與執法部門大鬥法，市民㩒機又要提心吊膽喇。永亨銀行聲稱首次發生類似事件，但根據警方記錄，今次已經係個半月內第四宗同類案件，油麻地、大埔及尖沙咀之前亦分別有銀行櫃員機被人安裝黑盒及讀卡器等，唔少市民受影響。係人都知，歹徒百變不離其宗，櫃機黨主要手法係趁客戶輸入密碼時偷拍，套取提款卡資料盜款。
話時話，櫃機黨幾年前曾經橫行一時，好多銀行都中過招，其中滙豐櫃員機被人裝咗讀卡器，導致多名客戶共被盜去幾十萬元，搞到市民人人自危。事後金管局亡羊補牢，曾要求銀行提升保安措施，例如加裝鍵盤保護罩，並加強宣傳，要求市民提高警惕，一度令櫃機黨銷聲匿迹。點知野火燒不盡，春風吹又生，櫃機黨好快又捲土重來，而且手法更加純熟，技術更加先進，又有讀卡器，又有針孔攝錄機，令人防不勝防。老實講，最近呢幾次如果唔係市民機警揭發，銀行同監管部門可能仲矇查查咋。
正所謂，道高一尺，魔高一丈，現時銀行嘅所謂保安措施，不過係加個鍵盤保護罩咁大把，聊勝於無，又點會難倒櫃機黨吖。正如專家話齋，讀卡器通街有得賣，而且操作簡易，配合針孔攝錄機雙管齊下，市民隨時中招。仲有吖，如果大家有留意，就會發現櫃機黨明顯改變策略，專向規模較細嘅銀行埋手，擺明恰佢哋保安冇咁嚴密。嗱，呢啲咪就係銀行及監管部門嘅疏忽囉。
金管局話喎，已規定銀行全面更換高防盜嘅晶片提款卡，一般讀卡器無法套取用戶資料。講係咁講啫，弊在更換需時，家陣科技日新月異，等你換得嚟，櫃機黨可能又搵到破解方法咯。
總而言之，櫃員機保安最怕百密一疏。櫃機黨周圍出擊，擇人而噬，市民固然要打醒十二分精神，銀行亦要加強保安措施，而警方更加要多啲巡邏，最重要係盡快將歹徒緝捕歸案。香港話晒都係國際金融中心，如果任由櫃機黨肆虐，呢塊金漆招牌遲早不保嘅咋！