笑看天下:《好報》爆盡勁料

《好報》十一月三十日周五閃爍登場,亮爆全城,冇嘢嘅,皆因《好報》好勁料,快意當前,老朽睇到拍爛手掌,「八」得來威風四面,猛料如雲,睇到人心花怒放。

正如「好娛論」話齋:世上原來真係有免費午餐,《好報》除了隨《太陽報》附送,並於全港熱點每逢周五免費派發。之不過,想享受免費午餐,記得周五早啲排隊攞番份,手快有,手慢冇!《好報》絕對唔係塞到埋心口都唔想攞嘅免費報紙。

「好娛論」有幾句說話,簡直如激光衝擊老朽嘅大近視兼老花眼:「做到最好!做到最辣!《好報》提供一個全嶄新的娛樂平台給讀者,全天候追擊藝人名人一舉一動,好料長爆長有。」就憑呢幾句,教我如何不逢周五就亢奮!老朽雖一把年紀,八卦之心不死,睇《好報》,既活潑吾心和雙眼,睇怕駁長條命,任立法會一眾政客次次拉布,都有機會攞到「長者生活津貼」二千二百蚊啩!

「做到最好!做到最辣!」使老朽想起內地傳媒有人提出辦報要有「五狗精神」,即係要像警犬一樣嗅覺靈敏,要像獵狗一樣尋找線索,要像瘋狗一樣追逐目標,要像狼狗一樣咬住唔放,要像哈巴狗一樣溫馴忠誠。

以東方報業集團一向追求更快更高更強嘅勇往精神,無懼權貴,嫉惡如仇,時時刻刻發揮正義傳媒正能量,《好報》仝人肯定深具「五狗精神」,為讀者索盡好料,爆盡勁料。總之,睇《好報》,城市八卦話題喺晒度,潮流品味你掌握。咁嘅免費午餐,老朽只能嘆一句:一周得一次,少啲囉!