政情：龍應台讚港有好材料
曾於香港大學任教嘅台灣首位文化部長龍應台尋日展開第三日訪港行程，並返到香港大學陸祐堂演講，與在座約五百名師生同嘉賓對話。有學生提及青年人關心政治嘅問題，龍應台就呼籲青年人要關心政治，決定自己嘅未來，但關心唔等於要鬧事，因為對抗權威係件比較容易嘅事情，當社會喺爭取到民主之後，其挑戰將會更大。
做官員要對得住人民
所以龍應台認為，青年人喺社會變得成熟時，要懂得就議題深思同判斷，呢啲先叫做關心政治。佢又比喻現時香港及台灣嘅政治氣候猶如杯啤酒，或予人一種吵鬧嘅感覺，但呢個只係表面嘅一層泡沫，好材料仍然留喺杯底。
由一位著名作家毅然成為政府官員，究竟佢嘅施政理念係乜？龍應台話，作為一個官員最重要係對得住人民。至於想做作家多啲定做部長多啲？佢就好巧妙咁話：「一個偶然注定另一個偶然」，所以過咗河就返唔到轉頭喎。論壇中談及唔少文化問題，但期間有一位學生問及台灣有否防止自殺嘅渠道，龍應台聞言即時顯得非常擔心，仲查問在座嘉賓知唔知道香港防止自殺機構嘅電話，以及多番叮囑青年人有自殺念頭時，一定要打個電話去求助，盡顯其愛民如子嘅一面。